Türkmenistandaky diplomatik  wekilhanalarynyň ýolbaşçylaryna sylag gowşurylyş dabarasy

2025-nji ýylyň 25-nji dekabrynda Aşgabat şäherindäki “Mekan” köşgünde Türkmenistanyň Halk Maslahatynyň guramagynda “Halkara parahatçylyk we ynanyşmak ýyly: Bitarap Türkmenistanyň ynamly gadamlary” atly dabara geçirildi. Oňa Hökümet agzalary, Türkmenistanyň diplomatik gullugynyň, daşary döwletleriň we halkara guramalaryň Aşgabatdaky diplomatik wekilhanalarynyň ýolbaşçylarydyr wekilleri, dürli pudaklarda zähmet çekýän raýatlar, ýaşlar gatnaşdylar. Dabaranyň geçirilýän ýerinde medeniýet we sungat ussatlarynyň aýdym-sazly çykyşlary ýaýbaňlandyryldy.

Dabara gatnaşyjylar halkymyzyň medeni mirasyna we ýurdumyzyň gazanan üstünliklerine bagyşlanan sergini synladylar. Soňra dabara “Mekan” köşgüniň mejlisler zalynda dowam etdi.

Türkmenistanyň Halk Maslahatynyň Diwanynyň iş dolandyryjysy R.Bazarow dabara gatnaşyjylary mübärekläp, «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabaranyň möhüm ähmiýetini belledi. Soňra Ministrler Kabinetiniň Başlygynyň orunbasary, daşary işler ministri R.Meredowa söz berildi.  Wise-premýer, daşary işler ministri örän möhüm jemgyýetçilik-syýasy waka — Türkmenistanyň Halk Maslahaty tarapyndan guralýan «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabara gatnaşyjylary mähirli mübärekläp, 2025-nji ýylyň Türkmenistanyň taryhynda, onuň döwletlilik ýörelgeleriniň, syýasy, ykdysady, durmuş ösüşiniň pugtalanmagynda möhüm tapgyr bolandygyny belledi.

Soňra Türkmenistanda hereket edýän diplomatik wekilhanalaryň ýolbaşçylary, şol sanda Eýran Yslam Respublikasynyň Türkmenistandaky ilçisi Ali Mojtaba Ruzbehani çykyş etdiler. Ilçi Türkmenistanyň Prezidenti Serdar Berdimuhamedowy hem-de türkmen halkynyň Milli Lideri, Türkmenistanyň Halk Maslahatynyň başlygy Gurbanguly Berdimuhamedowy Aşgabatda Halkara parahatçylyk we ynanyşmak ýylyna bagyşlanan halkara forumyň, Awazada BMG-niň Deňze çykalgasy bolmadyk ösüp barýan döwletler boýunça üçünji maslahatynyň üstünlikli geçirilmegi bilen gutlady.

Hormatly ilçiniň belleýşi ýaly, 2025-nji ýyl Eýran Yslam Respublikasy bilen Türkmenistanyň arasyndaky ikitaraplaýyn gatnaşyklarda möhüm ýyllaryň biri boldy. Eýranyň Prezidenti Masud Pezeşkianyň dekabr aýynda Aşgabatda geçirilen halkara foruma gatnaşmagy eýran tarapynyň sebitde parahatçylygy we özara hyzmatdaşlygy pugtalandyrmaga ygrarlydygynyň aýdyň beýany boldy. Şeýle-de Eýran Yslam Respublikasynyň birinji wise-prezidenti Mohammed Reza Arefiň BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmak üçin Türkmenistana sapar bilen gelmegi ikitaraplaýyn gatnaşyklary pugtalandyrmak babatda dialog üçin ajaýyp mümkinçilik boldy. Eýran we Türkmenistan dürli ugurlar boýunça, şol sanda medeniýet ulgamynda bilelikde iş alyp barýarlar. Taryhy mirasyň hem-de medeni we ruhy gymmatlyklaryň birmeňzeşligi özara hyzmatdaşlyk üçin berk binýat bolup durýar.

Jenap Ruzbehani doganlyk we hoşniýetli goňşuçylyk gatnaşyklarynyň Eýran we türkmen halklaryny birleşdirýändigini belläp, bu gatnaşyklaryň mundan beýläk hem ösdürilmegine ynam bildirdi.

Dabaranyň ahyrynda Ministrler Kabinetiniň Başlygynyň orunbasary, daşary işler ministri R.Meredow şanly sene mynasybetli, hormatly Prezidentimiziň daşary ýurt döwletleriniň we halkara guramalaryň Türkmenistandaky diplomatik wekilhanalarynyň ýolbaşçylaryny, Türkmenistanyň raýatlaryny “Türkmenistanyň Bitaraplygynyň 30 ýyllygyna” atly ýubileý medaly bilen sylaglamak hakynda Permanlara hem-de “Türkmenistanyň Bitaraplygynyň 30 ýyllygy” atly ýadygärlik kümüş nyşany bilen sylaglamak hakynda Karara gol çekendigini aýtdy.

Soňra bolsa Türkmenistanyň Prezidentiniň karary esasynda şu aşakdaky wekillere Türkmenistanyň Bitaraplygynyň 30 ýyllygyna” atly ýubileý medaly we “Türkmenistanyň Bitaraplygynyň 30 ýyllygy” atly ýadygärlik kümüş nyşany dabaraly ýagdaýda gowşuryldy:

Amerikanyň Birleşen Ştatlarynyň Türkmenistandaky Adatdan daşary we Doly ygtyýarly ilçisi Elizabet Helen Rud,

Azerbaýjan Respublikasynyň Türkmenistandaky Adatdan daşary we Doly ygtyýarly ilçisi Gismat Fuzuli ogly Gozalow,

Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ali Mardan Ruzbehani,

Germaniýa Federatiw Respublikasynyň Türkmenistandaky Adatdan daşary we Doly ygtyýarly ilçisi Bernd Ýosef Haýnsän,

Özbegistan Respublikasynyň Türkmenistandaky Adatdan daşary we Doly ygtyýarly ilçisi Rawşanbek Azatbekowiç Alimow,

Russiýa Federasiýasynyň Türkmenistandaky Adatdan daşary we Doly ygtyýarly ilçisi Iwan Kirillowiç Wolynkin,

Täjigistan Respublikasynyň Türkmenistandaky Adatdan daşary we Doly ygtyýarly ilçisi Wafo Niýatbekzoda,

Türkiýe Respublikasynyň Türkmenistandaky Adatdan daşary we Doly ygtyýarly ilçisi Ahmet Demirok,

Ýaponiýanyň Türkmenistandaky Adatdan daşary we Doly ygtyýarly ilçisi Hirosi Sasaki,

Koreýa Respublikasynyň Türkmenistandaky ilçihanasynyň işler wagtlaýyn ynanylan wekili Kim Jun Çol,

Birleşen Milletler Guramasynyň Çagalar gaznasynyň (ÝUNISEF) Türkmenistandaky wekili Jalpa Mulji Mawji Ratna,

Aziýanyň ösüş bankynyň Türkmenistandaky wekilhanasynyň ýolbaşçysy Artur Tadeusz Andrisýag.